[1] Nagpatuloy sa pagsasalita si Job, [2] “Sumusumpa ako sa Makapangyarihan at buhay na Dios na nagkait ng katarungan at nagdulot sa akin ng sama ng loob. [3] Habang akoʼy may hininga at pinapahintulutan niyang mabuhay, [4] hindi ako magsasalita ng masama at kasinungalingan. [5] Hinding-hindi ko matatanggap na tama kayo. Ipipilit ko pa rin na wala akong kasalanan hanggang sa mamatay ako. [6] Ipaglalaban kong tama ako, at hindi ako titigil. Malinis ang aking konsensya habang akoʼy nabubuhay. [7] “Parusahan nawa ng Dios ang mga kumakalaban sa akin ng parusang nararapat sa masasamang tao! [8] Sapagkat ano ang pag-asa ng taong walang takot sa Dios kung bawiin na ng Dios ang kanyang buhay? [9] Didinggin kaya ng Dios ang paghingi niya ng tulong kung dumating sa kanya ang kagipitan? [10] Matutuwa kaya siya sa Makapangyarihang Dios? Tatawag kaya siya sa kanya sa lahat ng oras? [11] “Tuturuan ko sana kayo ng tungkol sa kapangyarihan ng Dios. Sasabihin ko sa inyo ang mga pamamaraan niya. [12] Pero alam na pala ninyo ang lahat ng ito. Kaya bakit pa kayo nagsasalita sa akin ng walang kabuluhan? [13] “Ito ang kapalaran na itinakda ng Makapangyarihang Dios sa taong masama at malupit. [14] Kahit gaano kadami ang anak niya, mamamatay ang iba sa kanila sa digmaan at ang iba naman ay sa gutom. [15] Ang matitira sa kanila ay mamamatay sa sakit, at walang magluluksa sa pagkamatay nila, kahit ang kanilang mga asawa. [16] “Kahit mag-ipon ng maraming pilak at damit ang masamang tao, [17] hindi rin siya ang makikinabang nito. Ang matutuwid at walang kasalanan ang magsusuot ng kanyang mga damit at ang maghahati-hati sa kanyang mga pilak. [18] Ang itinatayo niyang bahay ay magiging kasinrupok ng sapot ng gagamba o kayaʼy silungan ng tagapagbantay sa bukid. [19] Matutulog siyang mayaman pero paggising niyaʼy wala na ang kanyang kayamanan. [20] Darating sa kanya ang takot na parang rumaragasang baha at tatangayin siya ng ipu-ipo pagsapit ng gabi. [21] Tatangayin siya ng hangin na mula sa silangan at mawawala siya sa kanyang tirahan. [22] Walang awa siyang tatangayin nito habang pinipilit niyang makatakas. [23] May mga papalakpak at susutsot sa kanya para mangutya, dahil wala na siya sa kanyang tinitirhan.
